Armenııa parlamentiniń 59 depýtatynyń daýysymen oppozısııa ókili Nıkol Pashınıan premer-mınıstr qyzmetine taǵaıyndaldy. Saılaý bitken soń Pashınıan parlamentke «Alǵys aıtamyn. Armenııa men armıan halqyna qyzmet etemin» dedi.
Negizinen oppozısıonerdiń qolyna beıresmı túrde bılik budan erterek ótken edi. Buǵan memlekettegi jappaı narazylyq aksııalary men onyń bıliktegi partııaǵa ózin saılaýǵa kóndirýi, saılanbaı jatyp 8 mamyr kúnin demalys retinde jarııalaýy dálel bolsa kerek.
Aıta ketý kerek, Pashınıan ekinshi múmkindikten soń premer-mınıstr bolyp saılandy. Ol ózine qajetti 53 daýystan da kóp qoldaý tapty.
Sırııada Reseı tikushaǵy apatqa ushyradySırııada Reseı áýe-ǵarysh kúshteriniń Ka-52 tikushaǵy apatqa ushyrap, 2 ushqysh qaıtys boldy. Reseı Qorǵanys mınıstrliginiń habarlaýynsha, áýe apatyna tehnıkalyq aqaýlar sebep bolýy múmkin. Bul Reseı áskerı bortynda bolǵan bir aptadaǵy ekinshi áýe apaty. Buǵan deıin 3 mamyr kúni Sý-30SM ıstrebıteli qulap, ushqyshtary qaza tapqan bolatyn.
Tikushaq 7 mamyr kúni túnde qulaǵan. Osy apatta mert bolǵandardy qosa alǵanda Sırııada qaıtys bolǵan Reseı áskerı qyzmetkerleriniń sany 87-ge jetti. Onyń ishinde eń iri apat 2018 jyldyń 6 naýryzynda boldy. Ol kezde An-26 ushaǵy qulap, 39 adam qaıtys bolǵan edi.
Ierýsalımde AQSh elshiligin ashýǵa daıyndyq jumystary júrgizilip jatyrKelesi aptada Izraıldegi AQSh elshiligi Tel-Avıvten Ierýsalımge kóshiriledi. Osyǵan oraı qala merııasy AQSh-tyń jańa elshiligine nusqaıtyn jol belgilerin ornalastyra bastaǵanyn habarlady. Qala meri Nır Barkattyń aıtýynsha, alǵashqy belgiler dúısenbi kúni Ierýsalımniń ońtústik bóligindegi kóshelerge qoıylǵan. Bul aýdannyń tańdalýy beker emes, sebebi jańa elshilik dál osy mańda ornalasady dep kútilýde.
Qala bıligi jibergen sýretterde jol belgisinde aǵylshyn, ıvrıt, arab tilderindegi «AQSh elshiligi» degen jazýdy baıqaýǵa bolady. Al Ierýsalımdegi AQSh-tyń jańa elshiligi 14 mamyr kúni ashylady. Oǵan AQSh prezıdenti Donald Tramp bastaǵan amerıkalyq delegasııa barady dep josparlanǵan.
Byltyr Donald Tramp Ierýsalımdi Izraıldiń astanasy retinde moıyndap, Amerıka elshiligin Tel-Avıvten kóshiretinin aıtqannan soń Izraıl-Palestına arasyndaǵy shıelenis kúsheıe túsken edi. Izraıl Ierýsalımdi máńgilik astanamyz dese, Palestına bul qalany óz memleketiniń kapıtaly sanaıdy.
Lıvanda 9 jyldan soń parlamenttik saılaý ótkizildiLıvanda parlamenttik saılaý 2014 jyly ótkizilýi kerek edi. Biraq jańa prezıdentti saılaýǵa qarsylyq kórsetken soń parlament óz jumysyn 2017 jylǵa deıin jalǵastyratyn boldy. Saılaý kúni 2017 jyldyń 21 mamyryna belgilenip, odan keıin qyrkúıek, qazan aılaryna aýystyrylǵan edi. Biraq memlekettegi saıası daǵdarys pen kórshi Sırııadaǵy soǵys sebebinen jıi aýystyrylǵan parlamenttik saılaý tek osy jyldyń 6 mamyrynda ótti. Saılaýda Lıvannyń Iran qoldaýyna ıe «Hezbolla» uıymy jeńiske jetti.
«Hezbolla» shııtter partııasy bılikke kelgen soń memlekettiń premer-mınıstri Saad Harırı basqaratyn «Al-Mýstakbal» qozǵalysy depýtattar palatasyndaǵy burynǵy yqpalynan aıyryldy. Saılaý nátıjesinde belgili bolǵandaı, «Hezbolla» 128 depýtattyq orynnyń 67-sin ıemdendi.
Lıvan ishki ister mınıstriniń aıtýynsha, daýys berýge halyqtyń 49,2 paıyzy qatysqan. Memleket astanasy Beırýt qalasynda turǵyndardyń tek 30 paıyzy daýys berýge barǵan.
Aıta ketý kerek, saılaý byltyr qabyldanǵan jańa zań boıynsha ótkizildi.
Sholýdy daıyndaǵan Gúlnur QÝANYShBEKQYZY,
«Egemen Qazaqstan»